លេខឆ្នោត៤ ខ្ទង់
មានពេលមួយអាត្មាបានដើរធុតង្គធ្លាក់រហូដល់ឆៀងម៉ៃ
ហើយបានឈប់សម្រាកដើម្បីបំពេញព្យាយាមនៅទីវត្តមួយដែលស្ថិតនៅជើងភ្នំសុថេប ក្នុងបរិវេណវត្តនោះត្រជាក់
មានម្លប់ត្រឈឹងត្រឈៃដោយរុក្ខជាតិផ្សេងៗច្រើនប្រភេទ។
នៅឆ្ងាយពីផ្ទះភូមិអ្នកស្រុក បរិយាកាសស្ងប់ស្ងាត់ល្មមគួរដល់
ការបដិបត្តិធម៌ នៅក្នុងវត្តនេះមានព្រះសង្ឃគង់នៅតិចទេ
ព្រះសង្ឃគ្រប់រូបមានការបដិបត្តិល្អគួឱ្យជ្រះថ្លា
ហើយដំណើរនៃការបដិបត្តិទៅតាមផ្លូវនៃសេចក្ដីបរិសុទ្ធ
លះបង់ដូចអាត្មាដែរ ។ ជាវត្តដែលគួឱ្យរីករាយជាទីបំផុត
ដែលអាត្មាបានជួប នៅចំកណ្ដាលវត្តមានអាងទឹកមួយ
យ៉ាងធំ មានទឹកថ្លាត្រជាក់ ដែលអាចទុកទឹកបានរហូតមួយឆ្នាំ
នៅជុំវិំញមានដើមឈើពោរពេញទៅដោយសន្លឹកមើល
ទៅស្អាតដូចជាអនោត្តស្រះ ដែលស្ថិតនៅកណ្ដាលព្រៃហេមពាន្ត ។
រៀងរាល់ពេលថ្ងៃរសៀលអាត្មា តែងចូលចិត្ត
ទៅអង្គុយលេងនៅលើគ្រែធ្វើអំពីឬស្សីនៅក្រោមដើឈើ
ជិតមាត់ស្រះមើលទៅរលកទឹក ដែលរត់មកប៉ះនឹងមាត់ច្រាំង
ហើយបាត់ទៅ តែងគិតប្រៀបធៀបទៅនឹងជីវិតរបស់ខ្លួន
ទៅតាមវិធីដែលលោកគ្រូអាចារ្យបានបង្រៀនមក
គឺជីវិតយើងប្រៀបបានដូចជាទឹករលក ឯកាលវេលាដូចជា
ខ្យល់ដែលបក់ដេញនៅរលកឱ្យចូលមកប៉ះនឹងមាត់ច្រាំង
គឺសេចក្ដីស្លាប់។
នាចុងសបា្ដហ៌ថ្ងៃសៅនឹងថ្ងៃអាទិត្យ តែងតែមានកម្លោះ
ក្រមុំ អ្នកស្រុកចូលចិត្តនាំគ្នាមកដើរកំសាន្តក្នុងវត្តនេះ។
មានក្រុមខ្លះហ៊ានមកសន្ទនាជាមួយអាត្មា នៅពេលដែល
ឃើញអាត្មាអង្គយនៅលើគ្រែមាត់ស្រះ បុ៉ន្តែគេចូលមក
សួរសំណេះសំណាលនោះអំពីធម៌អាថ៌នោះមានតិចទេ
ភាគច្រើនមកសូមរបស់សក័្កសិទ្ធិ និងលេខឆ្នោតតែបុណ្ណោះ។
ថ្ងៃមួយមានបុរសម្នាក់បានចូកមករកអាត្មា។
នៅពេលក្រាបថ្វាយបង្គំរួចហើយ
គេក៏ចាប់ផ្ដើមសុំកន្ទុយលេខ
ញោមចង់បានកន្ទុយលេខប៉ុន្មាន? អាត្មាសួរគេ
ប៉ុន្មានលេខក៏បានដែរ ស្រេចតែព្រះអង្គមេត្តា ។
គេឆ្លើយដោយទឹកមុខញញឹមខ្ជឹប សម្ដែងនូវការពេញចិត្ត
ពីរលេខក៏បាន បីលេខក៏បាន....
ញោមធ្លាប់ទិញមកហើយឬនៅ? ហើយដែលត្រូវឬទេ?
អាត្មាសួរគេ
ខ្ញុំកូណាធ្លាប់លេងមកច្រើនឆ្នាំមកហើយ បុ៉ន្តែមិនដែលត្រូវសោះ បើព្រអង្គមេត្តា សូទានឱ្យលេខច្បាស់ៗតែម្ដងមក ខ្ញុំនឹងចុះដើមទុនលេងចុងក្រោយនេះហើយនឹងឈប់លេងទៀតហើយ......
--អាត្មានឹងឱ្យយលេខដែលប្រាកដបំផុត ហើយដលទៅ៤លេខផង ។
បុរសនោះឱនក្បាលក្រាបអាត្មាដោយសេចក្ដីរីករាយ
ហើយសូមអរគុណ(ឃើញយ៉ាងជាក់ច្បាស់) ហើយពោលពាក្យចេញមកដោយសម្លេងអួលៗថាៈ
សូមមេត្តាផងចុះលោកម្ចាស់អើយ ខ្ញុំកូណានឹងមិនភ្លេចគុណលោកម្ចាស់អស់មួយជីវិត!
អាត្មាក៏ចាប់និយាយតទៅទៀតថា៖
- ជាដំបូងញោមត្រូវធ្វើខសន្យាជាមួយអាត្មាជាមុនសិនថា នឹងធ្វើតាមពាក្យអាត្មាគ្រប់យ៉ាង នឹងមិនមានការប្រកែកតវ៉ា ឬជំទាស់នៅពាក្យអាត្មា ប្រសិនជាញោមសន្យាបាន អាត្មាហ៊ានធានារ៉ាប់រងថាញោមនឹងទៅជាអ្នកមានពិតប្រាកដ។
-ខ្ញុំកូណារីករាយណាស់ នឹងធ្វើតាមពាក្យសន្យារបស់លោកម្ចាស់គ្រប់យ៉ាង។ គេបានឱ្យពាក្យសន្យាយ៉ាងពិតប្រាកដ។
- បើដូច្នេះ អាត្មានឹងប្រាប់ឥឡូវនេះលេខទាំង៤
លេខនេះមិនមែនជាលេខរបស់អាត្មាទេ គឺជាលេខរបស់ព្រះសម្មាសម្ពុទ្ធ ដែលព្រះអង្គប្រទានទុកមក មានមនុស្សជាច្រើនដែលជឿនឹងគោរពតាមព្រះអង្គ ហើយបានជួបប្រសព្វនូវសេចក្ដីរីកចម្រើន ទៅជាសេដ្ធីរហូត២៥០១ឆ្នាំមកហើយ.....
-លេខ១ មានឈ្មោះថា ឧដ្ឋានសម្បទា ប្រែថាដល់ព្រមដោយការខ្នះខ្នែងព្រាយាមប្រឹងប្រែងចាត់ចែងការងារ ដែលខ្លួនត្រូវប្រកបនោះៗ ដែលជាការប្រាសចាកទោស។
- លេខ២ មានឈ្មោះថា អារក្ខសម្បទា ប្រែថាដល់ព្រមដោយការថែរក្សាទ្រព្យដែលរកបានមក មិនឱ្យវិនាស ទៅដោយហេតុផ្សេងៗ មានភ្លើងឆេះ ចោរលួច នឹងលេងល្បែងភ្នាល់ជាដើម។
- លេខ ៣ មានឈ្មោះថា កល្យាណមិត្តតា ប្រែថាការដល់ព្រមដោយការសេពគប់មិត្ត គឺជាមិត្តដែលមានចិត្តល្អ ដែលតែងតែនាំឱ្យរកផលប្រយោជន៌ក្នុងបចុ្ចប្បន្ន គឺជាមនុស្សត្រង់មិនចេះបោកប្រាស។
-លេខ ៤ គឺមានឈ្មោះ ថា សមជីវិតា ប្រែថាជីវិតដ៏ប្រសើរ គឺរកទ្រព្យបានមកហើយចេះចាយវាយតាមកម្លាំងខ្លួនដែលបានមក មិនឱ្យខ្ជះខ្ជាយហួស។
សូឱ្យញោមចងចាំ ៤ លេខនេះទុក ហើយនាំយកទៅបដិបត្តិតាម ប្រសិនបើញោមមិនក្លាយទៅអ្នកមានក្នុងវាង៥ឆ្នាំទេសូមត្រឡប់មកតវ៉ាជាមួយអាត្មាវិញ។
បុរសនោះសម្លឹងមើលមកអាត្មាដោយក្រសែភ្នែកយ៉ាងយូរ ហើយទើបឱនក្រាបថ្វាបង្គំលាអាត្មាតែម្ដង រួចក៏ក្រោកចេញទៅ ដើរចេញទៅដោយមិននិយាយអ្វីសោះ ប្រហែលជាគេខុសបំណងយ៉ាងខ្លាំងហើយមើលទៅ នៅពេលគេដើរចេញបាត់ទៅក្នុងព្រៃហើយ អាត្មានឹកអាណិតដល់គេដែរ ប៉ុន្តែមិនអាចជួយគេបាន អាត្មាបានយល់ថា គឺបានធ្វើនូវនាទីរបស់ភិក្ខុយ៉ាងត្រឹមត្រូវហើយ ពីព្រោះព្រះសង្ឃ មិនមាននាទីទៅលើកតម្កើងនូវការលេងល្បែងភ្នាល់នោះទេ គឺមានតែដឹកនាំអ្នកវង្វេងវង្វាន់ឱ្យចូលមករកផ្លូវត្រូវតាមព្រះពុទ្ធសាសនា សូម្បីតែលេខ៤ខ្ទង់
ដែលអាត្មាបានប្រាប់គេនោះក៏មិនមែនជារឿងអាក្រក់
ឥប្រយោជនអ្វីដែរ ប្រសិនបើគេបដិបត្តិតាម គេនឹងទៅជា
អ្នកមានពិត គ្រាន់បើជាងទៅផ្សងសំណាង
ដែលមិនពិតប្រាកដខាងផ្លូវល្បែងនោះ។
ក្រោយពីហេតុការណ៍ ដែលកើតឡើងបន្តិចបន្ទួចនោះមក ប្រហែលជា៤ឬ៥ថ្ងៃក្រោយមក នៅពេលអាត្មាកំពុងអង្គុយពិចារណាធម៌ខណាមួយ នៅខាងអាងទឹកនោះ ស្រាប់តែឃើញប្រុសហើយនឹងស្រីមួយគូរ ដើរតម្រង់មករកអាត្មា។ នៅពេលជិតមកដល់ អាត្មានូវចាំបានថា គេគឺជាបុរសដែលមកសុំកន្ទុយលេខកាលពី៤ ឬ៥ថ្ងៃមុននោះឯង។
នឹកប្លែកក្នុងចិត្តថា តើដូចម្ដេចបានជាគេត្រឡប់មកវិញទៀត រំពេចនោះអាត្មាបានគិតភ្លាមថា ប្រហែលជាគេមកធ្វើបាបអាត្មាអញហើយមើលទៅ ! ប៉ុន្តែមិនបានភ័យអ្វីទេ
ពីព្រោះបានជឿជាក់ក្នុងព្រះធម៌ថា មនុស្សយើងបើមិនមែនគូរកម្មនឹងគ្នាអំពីជាតិមុននោះទេ មិនអាចធ្វើបាបគ្នាបាន
ដោយងាយៗនោះទេ ថាបើគេមកធ្វើបាបប្រហារជីវិតអាត្មាពិតមែននោះ ក៏ជាការល្អម្យ៉ាងដែរ ដោយគូរទាំងពីរខាងបានសងកម្មនឹងគ្នាឱ្យរួចហើយទៅ គិតដូច្នេះហើយក៏រងចាំគេដោយចិត្តស្ងប់ស្ងៀម។
- អ្នកទាំងពីរមកអង្គុយខាងមុខអាត្មា ក្រាបបង្គំយ៉ាងឱនលំទោន។ បុរសជាប្ដីបាននិយាយថា ៖
- ព្រះអង្គ! ខ្ញុំម្ចាស់នាំភរិយា មកថ្វាយបង្គំសូមអរព្រះគុណ។
-អាត្មាសួរគេវិញដោយឆ្ងល់៖
-អរគុណអាត្មារឿងអ្វីដែរញោម?
- រឿងដែលព្រះតេជគុណបានឱ្យកន្ទុយលេខទៅប្ដីរបស់ខ្ញុំព្រះករុណានោះអីទាន ភរិយារបស់គេឆ្លើយ
កាលពីថ្ងៃទីនោះនៅពេលដែលគាត់បានលេខពីព្រះអង្គភ្លាម បងក៏ទៅទិញលេខ ២ ៣ ៤ គាត់ប្រាកដក្នុងចិត្ត មានបុ៉ន្មានគាត់ទិញទាំងអស់ហើយក៏ត្រូវបានមួយ
សែនធ្វើឱ្យមេដួលអស់ពីខ្លួនតែម្ថង
នៅពេលឮរឿងនេះ ដោយមិនបានគិតមកសោះ អាត្មានឹកឆ្ងល់ក្នុងចិត្ត ទាំងចង់អស់សំណើច
ទាំងមិនសប្បាយចិត្ត នឹងឆ្ងល់ដល់ហេតុការណ៌ដែលមិនគួឱ្យជឿ គិតដល់ការមិនទៀងរបស់មនុស្ស រឿងសំណាង វាសនាហើយ មិនសប្បាយចិត្តដែលហេតុការណ៌នោះកើតឡើង ដោយមិនបានតាំងចិត្តរបស់ខ្លួន អ្នកទាំងពីរប្រហែលជា
ដើរប្រាប់គេឯងថា មាន បាន នេះដោសារអាត្មាហើយគេនឹងនាំគ្នាមកសុំ អាត្មាក៏ជាលោកសង្ឃឱ្យកន្ទុយលេខ។ ប្រសិនបើដូច្នេះមែន តើអាត្មារកពេលវេលាឯណានឹងបដិបត្តិធម៌នោះ ដើម្បីកំចាត់បង់នូវ ភ្លើងទុក្ខ ភ្លើងកិលេស អាត្មាគួតែរត់គេចចេញទៅនៅវត្តណាផ្សេង តែដោយសេចក្ដីសោកស្ដាយ ពីព្រោះអាត្មាចូលចិត្តវត្តនេះណាស់ គឺកំពុងតាំងចិត្តប្រតិបត្តិធម៌បានចម្រើនទៅមុខ ចង់នៅឱ្យបានយូរ។
--តើញោមបាននិយាយរឿងនេះប្រាប់គេអត់?
---ព្រះករុណា នៅទេ ! ស្វាមីឆ្លើយ ។ ដែលធ្វើឲ្យអាត្មាធូស្រាលចិត្តខ្លះ
--ញោមអាចជួយអ្វីដល់អាត្មាម្យា៉ងបានឬទេ ?
--កូណាបានទាន គេឆ្លើយយ៉ាងច្បាស់
-សូមនិមន្តប្រាប់មកចុះ ខ្ញុំព្រអង្គពេញចិត្តនឹងជួយគ្រប់យ៉ាង
ជាការសងគុណ។
---សូមញោមទុករឿងនេះជាអាថ៌កំបាំង
សូមកុំប្រាប់អ្នកណាជាដាច់ខាត នេះជា ខ ទី១
ខ មួយទៀតសូមឱ្យញោមឈប់លេងកន្ទុយលេខនេះតទៅទៀត អាត្មាសូមតែពីរយ៉ាងនេះទេ តើញោមអាចទទួលបានថាអាចធ្វើតាមអាត្មាសំណូមពរឬទេ?
-ខ្ញុំកូណាសូមទទួលថា នឹងបដិបត្តិតាមពាក្យទូន្មានរបស់លោកម្ចាស់គ្រប់យ៉ាង ពីព្រោះខ្ញុំកូណាបានតាំងចិត្តរួចជាស្រេចមកហើយថា នឹងនាំយកប្រាកមួយចំនួននេះទៅទិញដីមួយកន្លែង ហើយដាំដើមៀនបាន១រយដើម ឬ២រយដើម ចំណែកដែលនៅសល់ ខ្ញុំកូណានឹងយកទៅបើកហាងលក់របស់បន្តិចបន្តួច ល្មមនឹងចិញ្ចឹមជីវិតសិនទៅនៅពេលនៅជាមួយគ្នា ខំព្យាយាមសន្សំ ដើម្បីឲ្យបានទុនច្រើនឡើងហើយ ទើបនឹងពង្រីកកិច្ចការនុះនៅពេលក្រោយ
---នេះជាការគិតដ៏ល្អណាស់! អាត្មានិយាយដោយ
សេចក្ដីពេញចិត្ត សូមឱ្យញោមប្រកបកិច្ចការ តាមគោលលេខ៤ ខ្ទង ដែលអាត្មាបានប្រាប់ហើយ សូមឱ្យសុខចម្រើនក្នុងលោកិយវិស័យទៅចុះ។
ទាំងពីរនាក់ប្ដីប្រពន្ធលើកដៃសំពេះ ហើយពោលថា សាធុ សាធុ សាធុ ព្រមគ្នា ពេលរួចហើយ ភរិយាក៏លើកកញ្ចប់ក្រដាសមួយមកអំពីរកាបូបយួរ ហើយពោលថា៖
ដើម្បីជាការសងគុណយើងខ្ញុំបានសម្រេចចិត្តគ្នាថា សូមប្រគេនបច្ចយ័ដល់ព្រអង្គ មានចំនួន១ពាន់បាត សូមព្រះអង្គមេត្តាទទួលយកផងចុះ ថាហើយគេក៏លើកកញ្ចប់នោះហុចឱ្យអាត្មា
- ញោមដាក់នៅលើដីនេះសិនចុះ អាត្មាភាពជាព្រះសង្ឃមិនអាចទទួលប្រាក់នេះបានទេ ហើយអាត្មាក៏គ្មានការចាំបាច់ប្រើប្រាស់នៅមាសប្រាស់នុះដែរ អាត្មានៅម្នាកឯងក្នុងលោក អាហារមួយថ្ងៃមួយពេល ដើម្បីនឹងកាពារមិនឱ្យស្លាប់ ចីពរបីផ្ទាំងសម្រាប់ការពារក្ដៅត្រជាក់គ្រប់គ្រាន់ហើយសម្រាប់អាត្មា តែបើញោមមានសេចក្ដីប្រាថ្នាចង់ធ្វើបុណ្យ ដោយប្រាក់មួយចំនួន ចូរនាំទៅចូលរួមក្នុងមូលនិធិ ក្នុងវត្តចុះ
ប្រាក់របស់ញោម នឹងកើតជាប្រយោជន៌ក្នុងព្រះពុទ្ធសាសនា
យ៉ាងច្រើន ហើយបានយូអង្វែងញោមនឹងបានបុណ្យច្រើន
ជាងយកមកប្រគេនអាត្មា។
-ខ្ញុំកូណានឹងធ្វើតាមពាក្យពន្យល់របស់ព្រះអង្គ!
គេទាំងពីរនាកនោះពោលដោយសេចក្ដីគោរព
នេះជាហេតុការណ៌លើកទីមួយ ក្នុងជីវិតរបស់អាត្មា............😆
(ដកស្រង់ពីសៀវភៅ ព្រះភិក្ខុពនេចរ)
No comments