បទបំពេរ សត្វស៊ីមនុស្សពីរយ៉ាងដែលកាចសាហាវ បំផុតនៅលេីផែនដី

ឱ!ណាកូនអើយកូន ដេកទៅ ព្រលឹងពាលពៅកូនកុំយំ

ម្តាយច្រៀងបំពេរស្រស់មាសមុំ កូនអើយកុំយំខ្លាចសត្វខាំ

ឯសត្វស៊ីមនុស្សមានពីរយ៉ាង ម្តាយលាតត្រដាងអោយកូនចាំ

ពេលកូនធំឡើងត្រូវចំណាំ ម្តាយនឹងច្រៀងផ្តាំដូចច្នេះថា

ឯសត្វទីមួយគឺសត្វល្ងង់ ភ្នំទ្រនង់ខ្លាំងអស្ចារ្យ

មានច្រើនពេញពាសច្រើនលោកការ ចាំស៊ីម​នុស្សណាខ្ជិលរៀនសូត្រ

សត្វល្ងង់ស៊ីមនុស្សអោយខ្វាក់ភ្នែក សត្វនេះចំលែកស៊ីរហូត

វាស៊ីបញ្ញាមនុស្សរាប់កោដិ ខ្ជិលមិនរៀនសូត្រល្ងង់ស៊ីបាន

ឯសត្វទី២គឺសត្វក្រ កូនកុំត្រេកអរណាកល្បាណ

ភ្នែកវាធំៗប៉ុនៗចាន ចាំស៊ីសន្តានមនុស្សរាយមាយ

សត្វក្រស៊ីមនុស្សអោយថោកទាប អោយមនុស្សឯទៀតគេមើលងាយ

ខ្ជិលមិនធ្វើការចាយមិនខ្ជះខ្ជាយ ដេកចាំទំនាយអោយមានឯង

ណែកូនសំលាញ់ថ្លើមប្រមាត់ ល្ងង់ក្រកែក្តាត់គួរកែស្វែង

ដើរចាប់ស៊ីមនុស្សគ្រប់កន្លែង មិនមានកោដក្រែងនូវអ្នកណា

តែបើកូនមានការព្យាយាម ភ្ញាក់ស្មារតីភ្លាមហើយឧស្សាហ៍

គិតប្រឹងរៀនសូត្រហើយធ្វើការ ក្រល្ងង់ធ្វេហារស៊ីមិនបាន។