ខ្ទមស្រែកក់ក្តៅ

ស្រណោះខ្ទមស្រែម៉ែសាងទុក

ជាមួយនឹងពុកដោយផ្ទាល់ដៃ

ទោះបីនឿយហត់ទាំងយប់ថ្ងៃ

ប្រឹងប្រែងលកលៃព្រោះអាណិត។

ទាំងប្រាំងវស្សាការតូចធំ

ឈឺថ្កាត់លាយឡំមិនខ្វល់គិត

អោយតែរូបកូនបានសុខពិត

នេះហើយទឹកចិត្តឪពុកម្ដាយ។

ឥឡូវកូនធំមានជម្រក

តែបាត់រូបលោកទ្វេទាំងឡាយ

ក្ដីសុខមានតែសម្បកកាយ

ឯចិត្តរាយមាយឥតសុខសាន្ត។

បើអាចដូរយកវេលាវិញ

ឬអាចដូរទិញអតីតបាន

ចង់រស់ជួបជុំលោកពីរប្រាណ

ខ្ទមស្រែតែមានភាពកក់ក្តៅ។