កំណាព្យ អក្សរខ្មែរ

ខ្មែរមានអក្សរលម្អដើមចុង 

ក្បូរក្បាច់ផូរផង់ដូនតាទុកឱ្យ

​កុំមកវង្វេង​មិនដឹងមុខក្រោយ  

កូនខ្មែរនេះហើយថែអក្សរជាតិ។

អស្ចារ្យ​  ណាស់ទៅស៊ីងខ្មែរឡាតាំង​  

ទេីបនាំគ្នាតាំងបង្ហាញព្រោងព្រាត

លេីកគេខ្លាំងម្ល៉េះ​ ចេះរឿងចោលម្សៀត​  

ឯអក្សរជាតិមិនជួយលេីកផង។ 

ខ្មែរអោយតម្លៃ តម្លៃជាតិខ្មែរ

ខ្មែរជួយខំថែ ខ្មែរពិតចម្បង

គិតជាតិជាតិរស់សមដូចបំណង

ហើយមិនខុសឆ្គងបំណងដូនតា។

ខ្មែរសរសេរខ្មែរអក្សរខ្មែរយើង 

ដូចលើកតម្កើង គុណតួអក្ខរា

ឱ្យមានតម្លៃថ្លៃឫទ្ធិមហិមា

ព្រោះខ្មែរការពារ មិនខ្លាចសត្រូវ។

កុំឲ្យបរទេស វាយចាក់ប្រហារ

សម្លាប់ភាសាខ្មែរឲ្យធ្លាក់ជ្រៅ

បើជាជាតិខ្មែរជួយថែផងពៅ

កុំនាំអាស្រូវឱ្យដល់ជាតិខ្មែរ។

ដោយ: បញ្ញាបទីបោ ភុនសុធា